Anna minnist Arnar: „Þetta er mikið sjokk enda ósköp indæll maður“

Efnisorð

Deila

- Auglýsing -

„Þetta var ósköp indæll maður og ég hef ekkert nema gott af honum að segja,“ segir Anna J. Bjarnadóttir, nágranni Arnar Ingólfssonar sem fannst látinn utandyra í Breiðholti. Aðspurð segist Anna ekki hafa þekkt Örn náið en þau hafi þó ávallt heilsast á göngunum.

Hún hafði ekki séð til hans í nokkrar vikur en tengdi þó ekki fréttaflutning af líkfundi í Breiðholtinu við nágranna sinn. „Við þekktumst ekki mikið en heilsuðumst alltaf og buðum góðan daginn. Þegar mér var sagt þetta þá var það auðvitað mikið sjokk. Þó Örn hafi verið hlédrægur rólyndismaður og virtist ekki eiga neina að var hann fyrirmyndarnágranni og missir að honum,“ segir Anna.

Lögreglan á höfuðborgarsvæðinu hefur komist að nafni mannsins sem fannst látinn í Breiðholti, neðan Erluhóla, á dögunum. Hann hét Örn Ingólfsson og var 83 ára þegar hann lést.

Enginn hafði tilkynnt hvarf hans og virtist enginn vita að hann væri týndur. Ekkert sak­næmt er talið hafa átt sér stað. Málið hefur vakið talsverða athygli því sjaldgæft er að enginn veiti því eftirtekt ef Íslendingur hverfur skyndilega í miðri borg.

Lík Arnar heitins fannst í rjóðri fyrir neðan Erluhóla og var talið hafa verið þar í nokkurn tíma. Ekki er fyllilega ljóst hvenær hann lést en ljóst er að það eru nokkrir mánuðir síðan.

- Auglýsing -

Athugasemdir

Orðrómur

Lestu meira