Örlagaríkir leynifundir: Lögreglan rannsakar fjöldabrot Ballarin

Efnisorð

Deila

- Auglýsing -

Michele Roosevelt Edwards Ballarin fjárfestir er til rannsóknar hjá ákærusviði lögreglunnar á höfuðborgarsvæðinu. Hún margbraut sóttkví vegna leynifunda hérlendis. Bankastjóri Kvikubanka hraktist meðal annars í einangrun vegna brotanna.

Þetta staðfestir Hulda Elsa Björgvinsdóttir, sviðsstjóri ákærusviðs lögreglunnar á höfuðborgarsvæðinu. Annað en að rannsókn stæði yfir vildi hún ekki gefa upp í samtali við Mannlíf þannig að óljóst er á þessum tímapunkti hvort rannsóknin leiði til þess að Ballarin verði sektuð vegna fjöldabrotanna.

Hulda Elsa Björgvinsdóttir. Mynd / Skjáskot RÚV

Ballarin margbraut sóttvarnarreglur þegar hún var hér á landi í kringum hlutfjárútboð Icelandair. Hún fór meðal annars á fund með stjórnendum Kvikubanka, á kaffihús og út að borða þrátt fyrir að eiga að vera í sóttkví. Talsmaður hennar segir brotin hafa verið vegna misskilnings.

Samkvæmt sóttvarnareglum eiga allir þeir sem koma til landsins að undirgangast tvær skimanir með fimm daga sóttkví á milli. Ballarin og Gunnar Steinn Pálsson, talsmaður hennar, brutu þær reglur er þau fóru saman á kaffihúsið Te & kaffi í Borgartúni og þau fóru einnig út að borða á La Primavera veitingastaðnum. Þá fóru þau líka saman á fund með stjórnendum Kvikubanka, þeim Marínó Erni Tryggvasyni forstjóra og Ármanni Þorvaldssyni aðstoðarforstjóra. Marínó Örn þurfti að fara í sóttkví eftir að í ljós kom að Ballarin var sjálf að brjóta sóttkví með því að mæta til fundar í bankanum. Ármann þurfti ekki í sóttkví því hann hafði áður smitast af Covid-19 og var því með uppáskrifað ónæmi frá Þórólfi Guðnasyni sóttvarnarlækni.

Í samtali við Mannlíf staðfestir Ármann að fundurinn hafi farið fram að ósk Ballarin og Gunnars Steins. „Það er ekkert leyndamál að við hittum hana. Ég get staðfest að hún óskaði eftir fundi þar sem hún var að forvitnast um útboðið. Okkur var ekki ljóst á þeim tímapunkti að hún ætti að vera í sóttkví. Eftir á þurftum við því að grípa til viðeigandi ráðstafana,“ sagði Ármann í samtali við Mannlíf.

„Þar af leiðandi fórum við Michelle saman bara hingað og þangað um bæinn.“

Gunnar Steinn segist aðspurður ekki geta staðfest alla dagskrá fjárfestisins en hún hafi vissulega farið viða til að kanna landslagið í kringum Icelandair og möguleikana í stöðunni. „Kvikubanki er einn hluti af þessu og ég þekki strákana þar vel. Við vorum bæði í góðri trú þegar á fundina var farið. Lögmaður hennar hér á Íslandi hefur tekið á sig þennan misskilning og þar af leiðandi fórum við Michelle saman bara hingað og þangað um bæinn,“ sagði Gunnar Steinn.

Gunnar Steinn Pálsson

Koma Ballarin til landsins og þátttaka hennar í hlutafjárútboðinu reyndist hins vegar brotlending. Tilboði hennar var alfarið hafnað en lögmaður hennar hér á landi hafði enn ekki fengið staðfestingu á því hins vegar þegar Mannlíf ræddi við hann í gær.

Ballarin flaug af landi brott eftir að tilboði hennar upp á sjö milljarða króna í Icelandair var hafnað. Samkvæmt heimildum Mannlífs fór hún krókaleið heim til Bandaríkjanna um Evrópu. Hún hugðist kaupa kjölfestuhlut fyrir sjö milljarða króna í Icelandair en var hafnað þar sem hún þótti ekki geta sýnt fram á getu til að standa við tilboðið. Samkvæmt heimildum Mannlífs vildi Ballarin verða stjórnarformaður Icelandair. Viðræður milli hennar og stjórnenda Icelandair um samstarf stóðu yfir undanfarnar vikur.

Ballarin keypti eignir WOW air úr þrotabúi félagsins og lagði í gær fram sjö milljarða tilboð í hluti Icelandair. Ballarin var hins vegar hafnað og flaug hún af landi brott í kjölfarið. Hvort hennar bíði sekt við næstu komu til landsins á nú eftir að koma í ljós þegar rannsókn lögreglu lýkur.
- Auglýsing -

Athugasemdir

Orðrómur

Lestu meira