Smáframleiðendur slá í gegn – mikilvægir fyrir fæðuöruggi

Efnisorð

Deila

- Auglýsing -

Neytendavakt man.is ákvað að slá á þráinn til Oddnýjar Önnu Björnsdóttur, hampbónda í Berufirði og framkvæmdastjóra Samtaka Smáframleiðanda matvæla og spyrja frétta. Það er alveg á hreinu að maður kemur ekki að tómum kofanum hjá henni Oddnýu enda þekkt baráttukona þegar kemur að úrbótum í landbúnaðarmálum og matvælaframleiðslu í landinu og er alltaf að vasast í einhverju spennandi því tengdu.

„Sæl og blessuð, jú það má endilega segja frá því að samtök Smáframleiðanda fögnuðu eins árs afmæli 5. nóvember,“ segir Oddný hress og kát í Berufirðinum.

„Þetta ár hefur verið viðburðaríkt og margt hefur áunnist. Félagsmönnum með fulla aðild hefur fjölgað jafnt og þétt, eru í dag ríflega 100. Að auki erum við með á fimmta tug félaga með aukaaðild.“

Það verður að teljast ansi gott. „Það er þvílík flóra af flottum matarfrumkvöðlum um land allt sem spanna allt litrófið. Við erum sífellt að rekast á nýja frumkvöðla með spennandi nýjungar.“

Oddný segir samtökin leggja mikla áherslu á að þróa og kynna söluleiðir sem eru sérstaklega fyrir smáframleiðendur. Söluleiðum fer fjölgandi í takt við aukin áhuga og aukna eftirspurn. Stærsta samstarfsverknið er með Krónunni og gengur út á að setja upp sérstök svæði í tveimur verslunum, Lindum og á Selfossi, sem eru merkt „Matarbúr – hnossgæti frá íslenskum smáframleiðendum“.

„Við gerðum einnig samstarfssamning við Kjörbúðina, en vinna honum tengdum hefst á næsta ári. Verkefnið gengur út á að gera staðbundnar vörur smáframleiðenda sýnilegri í verslunum þeirra og stuðla að því að þær vörur sem framleiddar eru á hverju svæði séu seldar í þeim verslunum. Fyrirmyndin tengist Cittaslow hreyfingunni á Djúpavogi. Í Kjörbúðinni þar margfaldaðist sala þeirra vara eftir að þær voru merktar sérstaklega og úrvalið aukið.“

Oddný segir félagið hafa átt í farsælu samstarfi við Gott og blessað sem er ný vefverslun og lítil kjörbúð í Hafnarfirði sem sérhæfir sig í að selja og keyra heim vörur frá smáframleiðendum um land allt og valdar „gourmet“ vörur. Vel á fjórða tug félagsmanna selja nú vörur sínar í gegnum þau. Áhuginn er mikill, um þessar mundir bætist framleiðandi viðnánast daglega, en þeir eru í kringum 60 í dag. Fleiri leiðir eru til að nálgast vörur smáframleiðenda t.d. Reko Reykjavík, Reko Vesturland, þar sem boðið er upp á milliliðalaus viðskipti. Oddný segir fleiri og fleiri sýna því áhuga að selja vörur smáframleiðanda.

„Við lítum björtum augum til framtíðar. Áhugi og eftirspurn eftir vörum smáframleiðenda eykst stöðugt sem og skilningur fólks á mikilvægi þeirra til að tryggja framþróun, fjölbreytni og fæðuöryggi í landinu.“

Neytendavaktin hvetur landsmenn til að gefa smáframleiðendum gaum í jólabrjálæðinu. Matarhandverk er bæði sniðugt í pakkana sem og á veisluborðið.

- Auglýsing -
- Auglýsing -

Athugasemdir

Orðrómur

Forsíðuviðtal Mannlífs

Lestu meira