Mikael Máni hefur Háskólatónleikaröðina: „Njótið fallegrar tónlistar. Hún nærir, bætir og kætir“

Efnisorð

Deila

- Auglýsing -

Djassgítarleikarinn Mikael Máni ríður á vaðið ásamt hljómsveit sinni á fyrstu tónleikum tónleikaraðar Háskóla Íslands þetta haustið. Tónleikunum verður streymt frá Hátíðasal HÍ miðvikudaginn 21. október kl. 12.15. Í ljósi yfirstandandi samfélagshamlana verður salurinn  tómur, utan tæknifólks og tónlistarmanna. Tónleikarnir standa í um hálfa klukkustund.

„Takið frá miðvikudagshádegið í næstu viku og njótið fallegrar tónlistar. Hún nærir, bætir og kætir,“ segir dr. Arnar Eggert Thoroddsen, nýr umsjónarmaður tónleikaraðarinnar og listrænn stjórnandi.

„Í haust var mér falið það mikilsverða verkefni að halda utan um mánaðarlega tónleikaröð Háskóla Íslands. Ég tek við því kefli með þakklæti í huga og hlakka til að móta dagskrána næstu misseri. Það er enginn aukvisi sem á vaðið ríður, sjálfur Mikael Máni ásamt hljómsveit, en annað eins efni í íslenskum djassgítarleik er vandfundið.“

Facebook-viðburður og  hlekkur á tónleikana sem virkar eins og aðgöngudyr að tónleikunum.

Um tónleikaröð HÍ

Um áratugabil, og raunar í hálfa öld, hefur það verið hefð í Háskóla Íslands að standa fyrir svofelldum Háskólatónleikum. Um mánaðarlega viðburði er að ræða, á haust- og vormisseri, og fara þeir fram í byggingum Háskólans.

Djassgítarleikarinn Mikael Máni ríður á vaðið ásamt hljómsveit sinni á fyrstu tónleikum þessa hausts en mikið lof hefur verið borið á leik þessa efnilega tónlistarmanns undanfarin misseri, hér heima og erlendis. Tónleikunum verður streymt í ljósi yfirstandandi samfélagshamlana og salurinn verður tómur, utan tæknifólks og tónlistarmanna. Tónleikarnir standa í um hálfa klukkustund.

Nýr umsjónarmaður tónleikaraðarinnar og listrænn stjórnandi er dr. Arnar Eggert Thoroddsen og segist hann styðjast við slagorðið „Háskóli fyrir alla – Tónlist fyrir alla“ á þessum komandi vetri. „Þetta er mikið og gott bú sem ég tek við og ég vil nota þetta tækifæri og drjúpa höfði fyrir Margréti Jónsdóttur prófessor sem hefur haldið utan um þessa röð af einstakri fagmennsku og elju undanfarna áratugi. Hennar óeigingjarna starf hefur byggt glæsilega undir þessa hefð sem tónleikarnir eru löngu orðnir að.“

Arnar segist taka eigin slagorð alvarlega og leitast verði við að fá til samstarfs tónlistarmenn sem tilheyra alls kyns geirum, svo sem poppi/rokki, djass, klassík og bara því sem álitlegt þykir hverju sinni. „Það verður byggt á góðum grunni um leið og við þenjum röðina út í takt við nýja tíma. Fanga verður því leitað eins víða og kostur er. Einnig verður sérstök áhersla á að styðja við unga og efnilega listamenn og frumflutningi nýrra verka verður og gert hátt undir höfði.“

Síðar í haust verða tvennir tónleikar innan raðarinnar. Þeir fyrri verða með nútímatónlistarsveitinni Dymbrá 11. nóvember, en hún er skipuð kornungum stúlkum sem slógu í gegn á Músíktilraunum fyrir tveimur árum. Þá mun hin vel þokkaða sveit Umbra flytja jólatónlist með sínu annálaða nefi 16. desember.

- Auglýsing -

Athugasemdir

Orðrómur

Lestu meira