Saltlakkrís Jónsa er óður til skandinavíska sársaukans

Efnisorð

Deila

- Auglýsing -

Jónsi gefur í dag út lagið Salt Licorice, og sænska poppstjarnan Robyn syngur með honum í laginu. Lagið gefur forsmekkinn af fyrstu sólóplötu Jónsa í áratug, en platan kemur út á vegum Krunk útgáfunnar föstudaginn 2.október.

Jónsi og Robyn ferðast saman um hrjóstrugt tónlistarlandslag undir styrkri upptökustjórn A.G. Cook, stofnanda PC Music og listrænan tónlistarstjóra Charli XCX. Lagið er ögrandi blanda af þungum, drífandi takti og háværum bjölluhljómum sem koma saman í stormsveip af hljóðum. Í þessum óði til skandinavíska sársaukans hughreysta Jónsi og Robyn hvort annað í gegnum fortíðarþrá, kulnunina sem fylgir því að eldast og þunglyndi, en áhyggjurnar verða léttbærari þegar þeim er deilt með vini.

„Salt Licorice er svo sætt og fullkomið popplag,“ segir Robyn. „Það fær mig til að dansa á ofsafengin hátt og vilja fara í sleik á sama tíma. Ég þurfti ekki að hugsa mig tvisvar um þegar ég var beðin um að syngja lagið með Jónsa og allir fallegu tölvupóstarnir með þúsund emoji-táknum sem ég fékk frá honum kórónuðu bara samstarfið!“

Jónsi

Á plötunni Shiver er kafað djúpt ofan í mannlega vitund okkar og tengingu við náttúruna þar sem lífrænn og draumkenndur hljóðheimur Jónsa mætir vélrænni og framúrstefnulegri upptökustjórn A.G. Cook. Með þessu óvenjulega samstarfi heldur Jónsi áfram að þenja út mörk listformsins og skynjunar okkar.

Jónsi hélt sína fyrstu einkasýningu í hinu virta myndlistargalleríi Tanya Bonakdar Gallery í Los Angeles þar sem verk hans könnuðu áhrif hljóðs á fleiri skynfæri en bara eyrun. Síðustu ár hefur Jónsi þróað listsköpun sína í gegnum samstarfsverkefni með listamönnum á borð við Doug Aitken, Ólaf Elíasson, Merce Cunningham og nú síðast listamanninum og tónskáldinu Carl Michael von Hausswolf, en með honum stofnaði Jónsi tónlistarverkefnið Dark Morph.

- Auglýsing -

Athugasemdir

Orðrómur

Lestu meira