„Einstaklingar sem lifa og snúast í skógrækt er jarðbundið og fallegt fólk“

Efnisorð

Deila

- Auglýsing -

Hjördís Jónsdóttir útskrifaðist 25 ára gömul úr Ljósmyndaskólanum, en ljósmyndun er hennar ástríða og segist hún heppin að geta unnið við hana. Forvitni og áhugi á því að læra meira varð til þess að hún hóf nám í skógfræði við Landbúnaðarháskóla Íslands, sem hún segir mikilvægt fag og ótal starfstækifæri tengd náminu.

„Ég valdi námið í Ljósmyndaskólanum því ég vildi læra að tjá mig betur á myndrænan hátt. Ljósmyndun neyðir þig til að sleppa öllum kvíða og áhyggjum og þú einbeitir þér fullkomlega að þessu eina viðfangsefni sem er myndefnið. Það sem kom mér mest á óvart við það að vinna við ljósmyndun eru dýrmæt samskipti sem ég á með einstaklingum sem ég mynda,“ segir Hjördís, sem útskrifaðist fyrir ári síðan. „Ljósmyndun er ástríðan mín og mér finnst ég heppin að kalla það vinnuna mína.“

Fór í skógfræði vegna forvitni og áhuga

Hjördís segir að forvitni og áhugi á að læra meira um heiminn ýti sér út í að prófa nýja hluti. Hún hefur tamið sér að segja já við sem flestum nýjungum og hugmyndum og ekki séð eftir neinu enn þá heldur orðið reynslunni ríkari. „Þessi hugsunarháttur hefur reynst mér vel og fékk mig til að skrá mig í skógfræðinám í Landbúnaðarháskólanum,“ segir Hjördís.

Mynd / Hjördís

„Ég hafði upplifað mikinn loftlagskvíða í einhvern tíma og hugsaði mikið um hvernig ég gæti lagt mitt af mörkum en ég ákvað að ég vildi frekar nota tímann minn í að bæta umhverfið frekar en að taka þátt í eyðileggingu þess. Gróður er undirstaða lífs á jörðu eins og við þekkjum það. Við reiðum okkur á plöntur og annan gróður fyrir nánast allt. Helsta og lífsnauðsynlegasta hlutverk gróðurs er framleiðsla súrefnis og undirstaða fæðu okkar. Einnig reiðum við okkur á gróður fyrir lyf, fatnað, skjól, eldsneyti og samgöngur, eldivið, geðheilsu og innblástur, en fegurð gróðurs getur prýtt umhverfi okkar eins og list,“ segir Hjördís og bætir við:

„Á meðan vinkonur mínar þjást af „babyfever“ er ég illa haldin af „plöntufever“ og litlar líkur á bata á næstunni. Það er eitthvað fullnægjandi við að læra að hirða um lífveru og sjá hana dafna eða blómstra,“ segir Hjördís, sem segist vel geta hugsað sér að nýta ljósmyndunina í skógræktinni, þar sem henni þykir skóglendi eitt fallegasta og áhugaverðasta umhverfi í heimi.

Ótal tækifæri tengd skógfræðinni

Hjördís fann strax að loknu fyrsta námsári í skógfræðinni að ótal tækifæri voru tengd faginu og segir hún mikla eftirspurn eftir ungum einstaklingum innan skógræktargeirans. „Ísland er tilraunaland þegar kemur að mörgu og er skógrækt þar með talin. Aðeins lítill hluti trjátegunda þrífst hér á landi en mikilvægt er að þekkja aðrar erlendar tegundir og einkenni þeirra til þess að halda áfram tilraunastarfsemi í skógrækt. Með hlýnandi loftslagi gætu skilyrðin hérlendis orðið hentugri fyrir fleiri tegundir.“

Hjördís lætur vel af náminu og skólanum og segir að það sé greinilega aukinn áhugi á skógrækt, sem sést í fjölgun nýnema milli ára en á síðasta ári margfaldaðist fjöldi nýnema í skógfræðinni.

„Utan frá virðist skógfræði og skógrækt kannski vera frekar karllægt starf, en ég er ánægð með þann fjölda kvenna sem sækir í námið en konur eru í meirihluta í bekknum. Það er mjög hvetjandi að sjá aðrar flottar konur sækja í stéttir þar sem karlar hafa alltaf verið í miklum meirihluta og vonandi getum við orðið fyrirmyndir fyrir einhverjar ungar stelpur sem eiga eftir að ákveða framtíðarstarfið. Ég vil sjá fleiri konur í skógrækt!“ segir hún og brosir.

„Mikilvægi skógræktar mun aukast á næstu áratugum“

Hún lætur líka vel af skólanum og persónulegri starfsemi og viðmóti starfsfólks þar. „Viðmótið er jákvætt og allir tilbúnir til að hjálpast að. Ég er svo heppin að geta stundað námið sem er kennt á Hvanneyri þó að ég búi í Reykjavík en allir fyrirlestrar eru mér aðgengilegir á netinu. Skyldumæting í verklega kennslu fylgir þó náminu inn á milli, en á meðan ég læri um náttúru Íslandi fæ ég að njóta útivistar svo ég tel það algjöran plús,“ segir Hjördís.

Hjördís lætur vel af skógfræðináminu.

„Margir hafa áhuga á að græða landið og vinna úr afurðum skógarins en vita ekki alveg hvernig eða hvar þeir eiga að byrja. Nýlega stofnuðum við nokkur hópinn Ungviður, sem er nýtt Ungmennafélag SÍ (Skógræktarfélags Íslands). Við hvetjum alla áhugasama um að fylgjast með okkur þar sem við færum fréttir af viðburðum, gróðursetningum, fólki í listum sem vinnur með skógarafurðir og fallegt myndefni úr skógum Íslands,“ segir Hjördís.

„Ég sé mig auðveldlega geta unnið við skógrækt í framtíðinni en mikilvægi hennar mun einungis aukast á næstu áratugum. Það er ekki síst fólkið í skógræktinni sem laðar mann að en einstaklingar sem lifa og snúast í skógrækt er jarðbundið og fallegt fólk með hjartað á réttum stað og ég dáist að alúðinni sem það leggur í starfsemina

Landbúnaðarháskóli Íslands í samstarfi við Stúdíó Birtíng

- Auglýsing -

Athugasemdir

Lestu meira