10 þúsund hafa skrifað undir: „Erum bæði hrærð og þakklát fyrir hug og samstöðu fólks“

Efnisorð

Deila

- Auglýsing -

Á fyrsta sólarhring átaks Geðhjálpar á 39.is um að setja geðheilsu í forgang hafa safnast yfir 10.000 undirskriftir. „Við hjá Geðhjálp erum bæði hrærð og þakklát fyrir hug og samstöðu fólks. Geðheilsan er það verðmætasta sem við eigum. Hlúum að henni og hugum jafnframt að fólkinu í kringum okkur. Rjúfum einangrun og fordóma – færum geðið inn í ljósið,“ segir í tilkynningu frá Geðhjálp.

Sjálfsvíg á Íslandi árið 2019 voru 39

Sjálfsvíg eru einn af mælikvörðum geðheilsu í samfélaginu á hverjum tíma. Þau eru endapunktur og óafturkræf. Árið 2019 tóku 39 Íslendingar líf sitt. Tilgangurinn með því að birta tölu sjálfsvíga á Íslandi á síðasta ári er fyrst og fremst að beina sjónum að orsakaþáttum geðheilbrigðis. Þannig má auka umræðu um geðheilsu og orsakaþætti hennar og með því stuðla að framförum. Sjálfsvíg eru staðreynd sem samfélög þurfa að lifa með en þeim á ekki að fylgja skömm og/eða afneitun. Skynsamlegra er að horfast í augu við þau, viðurkenna en reyna jafnframt að koma í veg fyrir þau og draga úr tíðni þeirra. Leiðin til þess er að bæta og rækta geðheilsu þjóðarinnar og gefa henni gaum.

Horfum til orsakaþátta geðheilsu

Áhersla samfélagsins þegar kemur að geðheilsu hefur um langt árabil verið fyrst og fremst á einkenni, meðferð og endurhæfingu á þeim vanda sem kemur upp í stað þess að horfa til orsakaþátta. Þetta köllum við að vera fyrir neðan fossinn. Fyrir neðan fossinn fer fram meðferð og endurhæfing á einkennum og þar er vissulega víða pottur brotinn. Þar þarf að skoða hugmyndafræði, þvinganir og nauðung, fábreyttar aðferðir við meðferð, vannýtta heilsugæslu, vond kjör starfsmanna, mikla starfsmannaveltu, takmarkaða aðkomu notenda og aðstandenda, heftan aðgang að sálfræðimeðferð, einhæfni í nálgun sálfræðinga, gamaldags nálgun í aðstandendavinnu, takmörkuð búsetuúrræði og loks skort á virkniúrræðum og húsakost geðþjónustu á Íslandi.

Fyrir ofan fossinn eru hins vegar verndandi þættir geðheilbrigðis. Meðganga, frumbernska, barnæska, skólakerfið, árin á vinnumarkaði og ellin. Það að koma í veg fyrir hluta þeirra áfalla, sem einstaklingur verður fyrir á æviskeiði sínu og draga úr áhrifum þeirra, bætir geðheilsu. Þangað ættum við að færa áherslur okkar.

Áskorun um að setja geðheilsu í forgang

Við búum öll við geðheilsu og á lífsleiðinni göngum við öll í gegnum eitthvað sem hefur áhrif á hana. Nú finnum við á eigin skinni og sjáum það á fólkinu í kringum okkur hvað einangrun, óvissa og breytingar á athöfnum daglegs lífs geta haft mikil áhrif. Orsakaþættir geðheilsu eru fjölmargir og það skiptir máli hvernig við hugum að þeim og ræktum okkur.

Með því að taka þátt getum við saman sett geðheilsu í forgang í samfélaginu. Þú getur skrifað undir áskorun þess efnis hér: www.39.is.

Blað Geðhjálpar er komið út og er það helgað orsakaþáttum geðheilsu. Lesa má blaðið hér.

Fólk með sjálfsvígshugsanir er minnt á Hjálparsíma Rauða krossins 1717 og netspjallið. Einnig er hægt að leita til Píeta samtakanna, síminn þar er opinn allan sólahringinn 552 2218 og vefsíðan www.pieta.is.

Taktu þátt og saman setjum við geðheilsu í forgang í samfélaginu. Þú getur skrifað undir áskorun þess efnis hér: www.39.is.

Sjá einnig: Skelfilegar tölur frá lögreglu: Sjálfsvígum snarfjölgar í Covid-faraldri

Sjá einnig: Aukin tíðni Covid-sjálfsvíga: „Gagnsæi nauðsynlegt til að læra af aðgerðunum“

- Auglýsing -

Athugasemdir

Orðrómur

Lestu meira