„Hægt að sækja sálarbrotin“

Efnisorð

Deila

- Auglýsing -

Meðal indíána Norður-Ameríku störfuðu svokallaðir shamans. Vestrænir menn kusu að kalla þá töfralækna en galdurinn felst í að þeir tengjast andaheiminum til að veita lækningu og líkn. Eva Arna Ragnarsdóttir er að læra þessi fræði. Hún er snyrtifræðingur, svæðanuddari og heilari og nýtir alla þessa þekkingu til að draga úr streitu og auka vellíðan þeirra sem til hennar leita.

Líkega þætti flestum þetta alveg nóg en Eva Arna var einnig lengi flugfreyja og fararstjóri. „Ég hef mestmegnis starfað sem flugfreyja,“ segir hún. „Þótt ég sé snyrtifræðingur hefur stærstur hluti starfsferilsins snúist um flug. Þegar ég var yngri var ég úti í Sádi-Arabíu og flaug fyrir Atlanta um allan heim. Ég rak á sínum tíma mína eigin snyrtistofu. Ég var þessi týpíska íslenska ofurkona, var í fullri vinnu sem flugfreyja, rak fyrirtæki og var að farða uppi á Stöð 2. En þetta tók sinn toll og ég lenti í andlegu og líkamlegu þroti sem í dag kallast kulnun og því miður allt of margir lenda í. En mitt þrot varð til þess að ég fór ung að spá í hvað það væri sem skipti mig mestu máli í lífinu og mín niðurstaða var sú að það að hafa góða heilsu væri það mikilvægasta og að eiga góða fjölskyldu og vini, að láta drauma sína rætast og vera góð hvert við annað.

Andlitslyfting

Náttúruleg andlitslyfting

Eva Arna segist því þekkja af eigin raun hvernig hægt sé að keyra sig nánast í kaf í vinnu en hún er brosmild og hefur ákaflega róandi nærveru. Það er varla hægt að ímynda sér að þessi kona þekki streitu af eigin raun. Undanfarið hefur hún þróað og boðið upp á andlitsmeðferð sem kalla mætti mótandi andlitslyftingu eða sculptural facelift technique. Fæstir gera sér grein fyrir hversu mjög þreyta, stress og áhyggjur setjast að í andliti og meðferðinni er ætlað að vinna gegn því. En í hverju felst hún?

„Náttúruleg andlitslyfting er andlitsmeðferð til að lyfta og styrkja háls og andlitsvöðvana, meðferðin felst í öflugu nuddi sem styrkir og stinnir vöðvana,“ segir Eva Arna. „Í byrjun er sogæðakerfi líkamans virkjað og að henni lokinni fær húðin meiri ljóma, kjálkalína og kinnbein mótast og verða meira áberandi. Hver einasta hreyfing í nuddinu hefur sinn tilgang þar sem litlu vöðvarnir í andlitinu eru virkjaðir með nuddi. Þá er líka nuddað í kringum munnholið til að ná betur til smáu andlitsvöðvana, bæði í efri part andlits og neðri og losar það um spennu í kjálkum og andliti. Eins dregur meðferðin úr þrota og bjúg í andliti.

Ég legg mikið upp úr slökun í þessari meðferð og fyrir mér er þetta heilandi andlitsmeðferð þar sem dekrað er við bringu, háls og andlit með yndislegu nuddi og eins verður mikil tilfinningalosun þar sem ég trúi því að í andliti sé mikið af ósögðum tilfinningum og orðum og viðskiptavinurinn kemst í tengingu við sjálfan sig í slökuninni. Mín upplifun er að þetta er ekki síður andleg meðferð en líkamleg.

 „Sumt sem við erum að glíma við í þessu lífi er að fylgja okkur úr öðru lífi eða lífum og eins fylgja okkur munstur frá forfeðrum sem eru ekki að gagnast okkur í dag og þá er gott að skoða það og heila það tilfinningasár.“

Höfundur þessarar sérstöku tækni, Sculptural Facelift, er rússneskur, Yakov Gershkovich, og hefur hann þróað þessa meðferð í 20 ár og kennt hana víða um heim í sjö ár. Þessi meðferð hefur farið sigurför um heiminn og er orðin sú vinsælasta á markaðinum og er loksins í boði á Íslandi. Hugmyndin á bakvið meðferðina var að þróa og finna upp tækni til að þjálfa andlitsvöðvana og styrkja á sama hátt og við æfum líkamsvöðvana. Þessi kröftuga andlitsmótun er án aðgerðar eða inngrips með efnum og gengur út á að styrkja andlitsvöðva og losa um spennu í kjálkum og andliti. Þetta er sögð vera uppáhaldsandlitsmeðferð Meghan Markle, Jennifer Aniston og fleiri stórstjarna. Hún hentar bæði fyrir karla og konur og hjálpar fólki að verða besta útgáfan af sjálfu sér. Eins er þetta tilvalið fyrir þá sem eru með bótox eða önnur fyllingarefni til að fá virkni í vöðvana. Ég hafði fylgst með henni hjá Yakov í nokkur ár og sjálf verið í hugleiðingum um hvernig hægt væri að styrkja andlistvöðvana á árangursríkan hátt án inngrips með efnum.“

Andlitslyfting

Bætir eigin þekkingu við

Það varð til þess að hún lærði tæknina af Yakov í Póllandi en hún setur einnig sinn svip á það sem hún er að gera. „Ég hef komið með allt það besta úr svæðanuddinu og þeim andlegu fræðum sem ég hef verið að læra inn í þetta,“ segir hún. „Ég ákvað til dæmis að ljúka nuddinu með smáheilun og dekri að mínum hætti. Það sem mér finnst svo fallegt við þessa meðferð er að hver einasta hreyfing hefur tilgang og ásetning. Ég er nánast í eigin heimi meðan á henni stendur og er að hreyfa mig allan tímann til að ná fallegu flæði og leyfa kærleikanum að fljóta með. Þetta er þess vegna ekki eingöngu andlitsnudd heldur svo miklu meira.

Ég heyrði fyrst af Yakov fyrir nokkrum árum síðan og hóf þá að fylgjast með honum í gegnum Instagram og ákvað að einn daginn skyldi ég fara og læra þessa tækni sem hann kennir út um allan heim. Í fyrrasumar starfaði ég í afleysingum sem flugfreyja hjá Icelandair en varð að hætta fyrr en ætlað var vegna bakvandamála. Þá poppaði allt í einu upp að Yakov hygðist halda námskeið í Póllandi en þar hafði hann aldrei kennt áður svo ég ákvað að skella mér. Allar þær konur sem hafa byrjað hjá mér koma aftur og aftur. Þær koma í nokkur skipti fyrst og síðan reglulega til að halda þessu við. Fyrir mér er þetta eins og líkamsrækt fyrir andlitið.“

Lokaði á skyggnina í mörg ár

„Shaman er einhver sem talinn er hafa aðgang að og áhrif í heimi góðra og slæmra anda. Hann fer í trans í helgiathöfn og ástundar spádóma og heilun.“ Þetta er ein skilgreining á starfi shamans sem finna má á Netinu. Transkennt ástand og hreyfingar til að skapa líknandi flæði er því ekki fjarri þeim sem þekkir til shamans-fræða. Eva Arna er einnig svæðanuddari og ýtir þess vegna á ákveðna punkta í líkamanum meðan á meðferðinni stendur. Hún beitir einnig aðferðum reikiheilunar. En hvað vakti upphaflega áhuga hennar á fræðum eins og reiki og shaman?

„Ég held að það sé eitthvað sem ég fæddist með,“ segir Eva Arna. „Þegar ég var barn skynjaði ég, liggur við, orku betur en orð. Þá bæði sá ég framliðna og skynjaði hluti sem ég hélt að allir fyndu fyrir. Á unglingsaldri fannst mér þetta óþægilegt. Þetta var vissulega ákveðið áreiti á mann. Sem barn og unglingur hafði ég engan áhuga á svona hlutum og lokaði því alveg á skynjunina í mörg ár. Síðan fór ég að vinna sem fararstjóri úti á Krít og mamma mín dó á sama tíma og þá fór aftur allt að opnast án þess að ég hefði beðið um það. Ég fór á ný að skynja ákveðna orku í kringum fólk og stundum þarf engin orð, ég bara veit hvað er í gangi. Ég þurfti ekki annað en að leyfa mér að fylgja með flæðinu og finna hvað væri að gerast. Á Krít er svo falleg og mikil heilunarorka og auðvelt að vera tengdur sjálfum sér þar.

 „Þegar ég var barn skynjaði ég, liggur við, orku betur en orð. Þá bæði sá ég framliðna og skynjaði hluti sem ég hélt að allir fyndu fyrir. Á unglingsaldri fannst mér þetta óþægilegt.“

Í nokkur ár hef ég verið í mikilli sjálfsvinnu, meðal annars hjá einni yndislegustu konu sem ég hef kynnst, Jóhönnu Jónasar í Brennan-heilun, og það var hún sem kynnti mig fyrir shaman-náminu sem ég er í. Kennarinn minn er mögnuð kona, Patricia White Buffalo, og er einn fremsti og frægasti shaman í Bandaríkjunum ef ekki bara í heiminum. Með henni eru fjórir kennarar sem hafa mikla reynslu bæði sem kennarar í Barbara Brennan-skólanum og sem shaman. Þetta er í fyrsta skipti sem hún býður upp á svona nám á Íslandi svo þá má eiginlega segja að ég hafi bara leyft mér að fylgja straumnum þangað sem hann bar mig.“

Sækja brot af sálu sinni

Auk þess að kalla til góða anda öðrum til aðstoðar og hjálpar snúast shaman-fræðin um að aðstoða einstaklinga við tengjast aftur sjálfum sér og verða heilir. „Þú ert svolítið að fara heim,“ segir Eva Arna. „Í öllum þessum hraða og áreiti sem er í dag höfum við aftengst sjálfum okkur. Shaman er eitt það besta sem ég hef kynnst í langan tíma. Þar erum við að nota svo mikið hjartastöðina, fara í alls konar ferðalög og fá svör. Shaman trúa á endurheimt sálar. Þegar við lendum í áföllum hverfur brot af sálu okkar bara til að verja okkur gegn áfallinu.

En hægt er að sækja sálarbrotin í sérstökum hugleiðslum. Þá erum við að púsla okkur saman bæði úr þessu lífi og fyrri lífum. Við erum að laga orkusviðið okkar, endurbyggja það og verða heil á ný með því að hreinsa til dæmis ótta eða annað sem fylgir okkur en er ekki gagnlegt og tengjast aftur ljósinu okkar og leyfa því að skína. Það sem shaman snýst um er að taka í burtu það sem við erum EKKI og finna ljósið okkar. Egóið okkar stjórnar ansi miklu en um leið og við förum inn í hjartastöðina verður allt skýrt. Þar eru öll svörin.

 „Patricia kemur hingað þrisvar á ári. Hún hefur afskaplega sterka orku og nærveru og er göldrótt að mínu mati og þá meina ég á góðan hátt.“

Patricia kemur hingað þrisvar á ári. Hún hefur afskaplega sterka orku og nærveru og er göldrótt að mínu mati og þá meina ég á góðan hátt. Hún kenndi í mörg ár í Barbara Brennan-skólanum sem er einn virtasti heilunarskóli í Bandaríkjunum. Þegar hún kemur hingað förum við í alls konar ferðalög, hugleiðslur, transdansa, shaman-heilun og fleira. Þrátt fyrir að ég hafi alltaf verið mjög andlega sinnuð hef ég upplifað ótrúlega hluti í þessu ferli. Við göngum öll í gegnum erfiðleika og verkefni í lífinu og stundum erum við búin að byggja upp svo marga varnarveggi til að hlífa okkur fyrir erfiðleikunum að við týnum því hver við raunverulega erum. Það er ekkert eins frelsandi og að finna þessa veggi eða egó hrynja og vera maður sjálfur, sáttur við kosti og galla og leyfa kærleikanum að flæða bæði til sín og annarra. Ég hef alltaf verið mikil tilfinningamanneskja og þegar ég var yngri fann ég svolítið til þess að öðrum fannst það óþægilegt.“ Ég fór þess vegna að reyna að fela viðbrögð mín, verða meiri nagli. En í dag fagna ég öllum mínum tilfinningum, líka þeim erfiðu, og leyfi því að koma eins og mér er eðlilegt. Við erum öll með okkar verkefni og verðum að passa okkur að dæma ekki aðra og þeirra vegferð.

Ég hef alltaf verið mikill náttúruunnandi en nú tengist ég móður Jörð á allt annan hátt rétt eins og indíánarnir gerðu. Ég glímdi við kvíða þegar ég var barn og skildi aldrei af hverju. Ég ólst upp við mikið ástríki og hlýju og stuðning frá mínum foreldrum og var þess vegna alltaf að leita svara við hvaðan þessi kvíði minn kæmi. Sumt sem við erum að glíma við í þessu lífi er að fylgja okkur úr öðru lífi eða lífum og eins fylgja okkur munstur frá forfeðrum sem eru ekki að gagnast okkur í dag og þá er gott að skoða það og heila það tilfinningasár. Nú stunda ég hugleiðslu og heilun á hverjum degi, tengist sjálfri mér og tengist móður Jörð og kærleiksorkunni sem er alls staðar í kringum okkur.

Shaman-heilun er heildræn og þar ríkir sú sama trú og finna má í indverskri og kínverskri læknisfræði að líkami og sál séu eitt. Aldrei nægi að lækna líkamalega kvilla eingöngu því sálin verði einnig að fylgja. Nútímaástundun þessara fræða snýst um að opna augu fólks fyrir andlegri hlið sinni og sinna þeirri hlið heilsu sinnar. Að gefa sér tíma til að njóta slökunar og dekurs á bekk hjá snyrtifræðingi er án efa liður í að gæta hennar hvort sem menn vilja trúa á mátt shaman-heilara eða ekki.

 

 

- Auglýsing -

Athugasemdir

Lestu meira